Mara Autonomous Dist. Council inthlannaa buaina chhuahna, Lungdar khua-ah vawiin khan ven himna tha tak hnuaiah tluang taka vote thlak that a ni

Mara Autonomous Dist. Council inthlannaa buaina chhuahna, Lungdar khua-ah vawiin khan ven himna tha tak hnuaiah tluang taka vote thlak that a ni. Returning Officer, Pu Zahminga hnen atanga vawiin tlaia kan Corr. thu dawn danin, he khuaah hian Vote nei mi 130 an awm a, vawiin chawhnu her thleng khan heng zinga mi 120 te chuan vote an thlak tawh a, hemi hnu hian vote thlak a han duak a, mahse, hun tiam chhung a ral hma chuan Presiding Officer leh Polling Officer-te hian vote thlak tur an nghak zui a ni. He vote thlak thatna hi zawh fel a nih veleh, Ballot Box hi Saiha lam panpui nghal a ni a, naktuk zing lamah chuan Saiha thlenpui theih a nih beisei a ni. Hetih lai hian Polling Station 63 a hman, Strong room-a Ballot Box dahte chu Police ten tha takin an veng a, Vote tlate hi Thawhtanni khian chhiar a ni tawh dawn a, hemi ni hian Candidate 55 te dinhmun chu fiah a ni dawn a ni. Returning Officer sawi danin Counting Hall pawh peih fel a, vote chhiarna tur dawhkan 10 hun a ni a, Vote tla hi a pumpuiin sing chuang awrh a nih avang hian Round 2-naah chuan chhiar zawh vek theih beisei a ni a, chawhnu lamah chuan dinhmun pumpui hriat theih beisei a ni. Hetih lai hian he inthlannaa Party inepna a nasat em avangin vote chhiarna hmunah hian venhimna uluk taka siam a ni dawn a, Police hotute chuan Returning Officer nena ruahmanna an siam chu khauh takin an keng kawh dawn a, mipui thlen theih chin leh mi chi hrang hrang, vote chhiartu ni lote thlen theih chin pawh siam a, khauh taka ken kawh a ni ang. Tun tum inthlannaa thlan tlinte hi District Council Chairman-a an thlan duh hming May ni 9 khian pe lut tura hriattir an ni a , Chairman hi tun thla ni 11-ah thlan a ni ang. Hemi hma lam hian Party zinga thlan tlin member ngah ber chuan an Legislature party hruaitu tur, Council Chief Executive member hna chelhtu tur an thlan fel hmasa ang a, an danin a phut angin Chairman thlan hma hian District Council Court President-in thlan tlinte hi member atan rinawmna thu tiam tirin a la lut dawn a ni.

Source: http://zonet.in/index.php?nid=18