MDC pension bill chu session ah pawm a ni ta a

* MDC pension bill chu session ah pawm a ni ta a,eptu member te erawh chuan bill luh dan a dik lo tiin House an chhuahsan thung.

* Saiha district tana tul leh mamawh thlen turin Pu Rodney Lalrinawma,DC Saiha chuan nimin khan Aizawl a pan.

* DC Saiha Conference Hall-ah sorkar hnathawkte pualin Establishment & Administration training chhunzawm mek a ni.

* Pi S.Lalmuanpuii,I&PO, MADC chuan thuthar la khawmtute chu tan la zual sauh turin a fuih a, an thawhpuina leh tawiawmna a dawn that avanga lawm awm a tih thu leh sorkarin media te hmasawn zelna tur kawng a dap chhunzawm zel tur thu a sawi.

* Pu Lalramnghaka Chinzah, Editor Kawl chu Aizawlah in check-up in a kal a, dam taka a lo haw leh ML in a duhsak.

ECM Executive meeting

ECM kohhran puipate thukhawm chuan Assembly lo awm tur an thlir lawk a. Committee members neiin AEC-ah hian rorel thei palai 62 an tel a ni.Kan hma lawka Feb 25 - 1 March 2009 a ECM 86th Assembly a thlen tur Agenda pawimawh tak tak 41 an chai a, 2009 atana budget thlirlawkna leh Reformation in a constitution & Rules a recommend te pawh an endik tel bawk.

Budget tlangpui 1) General 252 lakhs leh 2) Mission 111 lakhs Assembly pass tir tum a ni a, ECM 7th pay commission Recommend erawh chu thawktute ngenna angin hman rih lova central 6th pay commission nghah mek a ni bawk. Theological College nei ve nise tihte, Hospital tihlen nise,Doctor leh Nurse neih belh leh Missionary tirhbelh nise tih relin Pro Pastor pahnih te Pastor puitling ah ordain tir Assembly a recommend tum thu leh a dang te an rel a ni.

86th ECM Assembly Speaker system a hman a ni ang a,Speaker atan foreign palai 1)Rev.Chua Yeown San 2) Dr.Stanley Ling 3) Rev.Vern Hancock leh Mrs Jennifer Hancock te an lokal dawn a ni tih Rev.MC.Zahluna,Assembly Secretary(Jr) hnen atanga thu dawn a ni. Zaipawl ruat te: ECM Choir, New Colony, Siaha Vaihpi, Gilgal, Shalom,Bethesda, Bethel, College vaih, Imanuel

Editorial

Faina leh Thianghlimna

Saiha khawpuia chengte hi fashion lamah pawh kan sang hle a,Aizawl nen dang lamna tehchiam a awm lo tih theih a ni. Fashion lamah hian eng ang pawhin sang mah ila,kan khawpui a tawp tlat si chuan awmzia kan nei chuang lo a ni. NGO lam in theihtawp chhuahin faina leh thianghlimna kawngah tan an la a,mahse mipui bawk hi kan harh thei chuang lova, mahni compound theuh pawh kan tifai peih emaw chu? Kan Hospital takngial pawh inthiar na tur awm lo khawpin a tawp nia sawi a ni a,KTP Branch pakhatin an thenfai hnuah pawh a chhunga thawk ten an chhunzawm ta lo nge tunlai hian sawisel a hlawh thar leh hle.

Veng hrang hrang hian mahni veng theuh faina leh thianghlimna kawngah enkawl uluk ila a tha ang. Office hrang hrang banga chinat tahna var leh kuhva ei chhakna ni ngeia hriat te hi Saiha mipui inthlahdahna leh tawpzia entirtu a ni leh zel bawk. Bawlhhlawhte hi khawlaiah paih lo ila, a bawmah ngei paih thin ila,tichuan khawlai tifaitu kan ni lo pawhin a faisa titawptu erawh niloh theuh i tum teh ang u.