Mara Autonomous District Council inthlanna result puan hnu, nizan khan member 15 nei, Congress leh MDF member thlan tlinte chuan United Legislature Party hruaitu atan Pu S. Khipo an thlang a, Chairman atan Pu S. Vadyu an thlang bawk. Saihaa kan corr. sawi danin, nizana CEM Bangla-a an inkhawmah hian Congress Candidate, Tuisih bial atanga thlan tlin, Pu S. Khipo hi an United Legislature Party hruaitu atan lungrual takin an thlang a, MDF Ticket a Saihatlangkawn atanga thlan tlin, S.Vadyu pawh he Council-a hna sang dang, Chairman hna chelh turin lungrual takin an thlang a ni. Pu S. Khipo, United Legislature Party hruaitu - Chief Executive member hna chelhtu tur atan an thlan thu hi vawiin khan Governor hriattir nghal a ni a, Governor hian Delhi atangin naktukah Aizawl a lo lut ang a, hemi hnu hian an thu thehluh hi a ngaihtuah ang a, a pawm hnuah chauh C E M atan lak luh a ni ang. Chairman atana thlan, Pu S. Vadyu hian vawiin, Nomination pek luh theih ni khan, Chairman thlanna chuh turin District Council Secretary hnenah a hming a pe lut a, hemi hnua kan corr. thu dawn danin Pu S. Vadyu bak hi mi dang Chairman hna chuh ve tuma hming pe lut an awm lo a ni. MADC member thlan thar mi 22-te hian tun thla ni 11, Zirtawpni khian Session hmasa ber an nei ang a, he Session kaihruai tur hian Protem Chairman atan Pu M. Laikaw ruat a ni a, ani hi Tongkolong bial atanga MDF ticket a thlan tlin a ni a, Protem Chairman tura rawtna pawh hi Governor pawmpui tur bawk a ni.
Source: Zonet.in
Subscribe to:
Post Comments (Atom)
No comments:
Post a Comment