MADC Member atana thlan thar, mi 22-te chu vawiin tlai khan District Council Member atan, rinawmna thu tiamtira lak luh an ni.

Mara Autonomous District Council Member thlan thar, mi 22-te chu vawiin tlai khan District Council Member atan, rinawmna thu tiamtira lak luh an ni. Rinawmna thu hi an dan tlawh chhanin, District Council Court President, Pu T.A. Chhohu an CEM Office-ah a tiamtir a, Autonomous District Council thar din tur hian member thlan tlin thar zing atang hian Chairman tur tun thla ni 11, Zirtawpni khian thlan a ni ang a, inthlanna chuh tumte chuan naktuk zing dar 10 leh tlai dar 3 inkarah Returning Officer hna thawktu tur, MADC Secretary hnenah an hming an pek luh a ngai dawn a ni. Thlan tlin tharte hian Session hall-ah Session hmasa ber, tun kar Zirtawpni, ni 11 khian neiin Chairman an thlang dawn a ni. Hetih lai hian he inthlannaa seat 15 latu, Congress leh MDF tang dun chuan Sorkar thar siam turin hma an la chho zel a, Saiha a kan corr. sawi danin, zanin dar 7 hian Chief Executive Member Bangla-ah Congress leh MDF member thlan tharte chu an thukhawm ang a, hetah hian United Legislature Party hruaitu an thlang ang a, an mi thlan chhuah hi Sorkar thar hruaitu, Chief Executive member a ni dawn a ni. Puan tawh angin MADC inthlanna result, nizana puan kim takah hian Seat awm zawng zawng, 22 zinga seat 15 chu Congress leh MDF tang dunin an la a, hneh takin sorkar an siam thei dawn ta a ni. Heng zinga seat 8 chu Congress lak a ni a, seat 7 dang chu MDF lak a ni thung a, rorelna lo chang thintu, MNF chuan seat 7 chauh a la phak ta a ni. Congress Candidate 8, thlan tlinte hi, Laki-ah Pu K. Chhuabei, Chapuiah Pu F.C. Zahse,Chakhangah Pu K.Hrahmo, Tuisih-ah Pu S.Khipo, Council vengah Pu K.H.Beihlo, Saiha vengpuiah Pu K.Beisa, College vengah Pu V.Vanhupa leh Meisavaih-ah Pu H.Sahlo-te an ni a, MDF Candidate 7 thlan tlin takte hi Tongkolongah Pu M.Laiko, Phura-ah Pu Beisa Kathie, Tuipang I-ah Pu S.Lalremthanga, Zawnglingah Pu B.Tusa, Chhuarlungah Pu M H Tiabi, Saihatlangkawnah Pu S.Vadyu, leh New Colony-ah Pu V.B.Byhna te an ni a, MNF Candidate thlan tlin 7-te hi Tuipang II-ah Pu N.Naphie, Siata-ah Pu L.Khaichyu, Niawhtlangah Pu N.Lalhmunsanga, Serkawrah Pu I. P. Junior, Maubawkah Pu L.C.Hlychho, New Saihaah Pu Lengduna, leh Romibawkah Pu H.C. Lalmalsawma Zasai-te an ni. MADC inthlanna Result chu Mizoram Pradesh Congress chuan lawmawm an tih thu sawiin hei hi Democracy rah beh tuma Mizoram sorkar thil tih, mipuiten an kut thlaka an hnawlna a ni a ti a, he inthlannaah hian MNF chu an hruaitu lu ber leh Minister rual nen thawk mah se a hlawhtling lova, hei hian an chunga mipuite beidawnzia a tilang nia sawiin, chhim lam atangin thlifim a tleh tan ta a ni, an thu chhuah chuan a ti bawk.

Source: Zonet.in