Gospel Centenary Main Celebration ropui takin hman mek zel ani

Saiha,Nov,12: Maraland Gospel Centenary Main Cele -bration chu District Playground,Saiha-ah hman mek zel a ni a, nimin khan Dr.K.Beichhua chu Master of Ceremony niin Pute H.Vabeitha, C.Thahe leh Miss P.P.Beinonai ten hneh takin an host a, Siaha Vaihpi Choir leh YMA Choir ten hla an rem a, Macha S.Vadyu, Chairman,MADC chuan thuchah a sawi a. Chapi, Hermon, Tisi, BCM,saiha, Presbyterian,Saiha,Chakhei leh LIKBK chuan hnamlam an entir a, J.Vialua, C.Reuben, H.C.Ngoki, Kalvary Hlychho leh Emely te an zai bawk. Nizan Entertainment programme chu Macha Dr.K.Zohra MC niin, Km.V.Samson leh Miss S.Lalmuanzuali ten hneh takin an host a, ECM Choir leh Centenary Musical Band ten hla an rem a,IKK leh MEC atangin thuchah ngaihthlak a ni. Macha S.Khipo, CEM, MADC chuan thuchah sawiin “ Mara fate hi tlem te thlan leh zawnchhuah tlak loh ni mah ila, Pathian chuan min hmangaih em em a, Rev.R.A.Lorrain hmangin min zawng chhuak a, chu chanchintha chuan kawng hrang hrang ah hmasawnna tin reng min thlen a ni tih a taka hmutute kan ni” tiin tunah hian Pathian ram chu a thleng tawh a,mimal nun theuh ah kan lo senglut em tih erawh kan inbihchian theuh a tul a ni,tho a eng turin Lalpan min buatsaih a ni tih i hriain thovin i eng ang u,a ti.

Sava var thlawk kual

Maraland Gospel Centenary Main Celebration Sunday programme hman lai khan Rev. R.A.Lorrain Stadium chung zawnah Sava var 7 a thlawk kual reng a, a changin pathum an ni a, a changin pasarih an ni leh thin tih a hmutu mi tam tak chuan kan palai an hrilh.

Upa leh naupang ber

Maraland Gospel Centenary Main Celebration rawn chhimtute zinga upa ber chu Pu Beitha Hlychho (89), Chhuarlung a ni a, a naupang ber chu Mary Jones (thla 4 ),Siasi a ni thung.

Health Seminar

Nimin khan Medical Hall ah Heal Seminar buatsaih a ni a,he programme Dr.L. T.Tluanga kaihhruai ah hian thu sawiin Dr.N. Palai, Addl.Director, Health Department leh National Rural Health Mission (NRHM) Mizo ram hotupa ber ni bawk chuan thu sawiin, hrisel loh chuan hmasawnna a awm thei lo, bawrhsawm na hi kan sum leh pai ei zotu leh In hmun thleng pawha min hralhtirtu a ni,tiin VCP Chairman-na hnuaiah Village Health & Sanitation Committee din vek a ni a, Rs.10,000/- theuh kumtin pek an ni ang,a ti.

Dr.N.Palai chuan khum 100 awm theihna Civil Hospital chu Central sorkar sum hmangin Saiha ah nakum atangin kan din sak nghal dawn che u a, contractor chu Aizawl mi kan thlang fel tawh a,hemi chungchangah Minister nen pawh kan inkhak nasa hle a,a chhan chu Saiha mi tan deposit pawh a harsat a rinawm a,hna tha leh Saiha mipui tana ro tling ka duh tlat avangin Aizawl mi ngeiin a tlin ang,a thawh that loh chuan Dr.N.Palai hi mi daw heh, thusawi a ding lo,tiin min rawn chhuahchhal ang che u,a ti.Aizawla rotling hna thawk tur chuan Delhi hi an pawimawh bok,a ti.

CYLA Hall en

CYLA President Pu J. Sangthangpuia leh CYLA Gen.Secy Pu Ziak tluanga chuan Lawngtlaia CYLA Hall sak zawh tep a hmuna ensak tura Pu Jeffrey Khara an ngenna ngai pawimawhin Pu Jeffrey Khara chuan a hmunah ngei a en a,mi 900-1000 vel len theihna tur niin mi 2000 tal len theihna nise duhthusam a ni,tiin Pu Jeffrey chuan a hrilh hlawm a,mahse ram an nei limit tlat a ni tih an lo hrilh. RSVY sum hmanga sak CYLA Hall, L-III a sak hi January ah an hawng dawn a, Special Guest atana an rawn sawm tur thu an hrilh bawk.

Centenary rawn chhim

Pu Jim K.Chozah,Dy. Director, Information & Public Relations te nupa, Dr.N.Palai,Add.Director, Health te nupa leh Pu N.Zahry, Dy.Secy,IPR te chuan Maraland Gospel Centenary Main Celebration an rawn chhim a, Pu Jim te nupa hi nimin khan Aizawl panin an chhuak leh tawh a ni.Pu Jim hi tun kum tawp lamah hian Joint Director ah kaisang tura beisei mek a ni.* Centenary Solo & Choir competition final round result chu 18.11.07 zan ah puan a ni dawn a, mipuiin an nghakhlelh hle a ni.