Saiha Teachers’ Union(STU) Annual Conference 32

* Nimin khan Saiha Teachers’ Union(STU) Annual Conference 32-na Govt High School, New Saiha-ah neih a ni a,Dr.Chawng khuma Chawngthu, President-in a kaihruai a, Rev.Lalberkhawpuimawia, MBK,Saiha chuan hunserh a hmang a, khuallian Pi Sangthanmawii,Jt.Director, SCERT, Mizoram chuan thusawina a nei . Pu K. Hrahmo,EM,Education, MADC leh Pu H.Lalfak zuala, Principal,DIET,Saiha ten thusawina an nei a ni.

* Macha S.Hrachu thawnthubu (Love story) ‘VAHIHSYNO’ tih bu chu Pu MH.Tiabi,EM,Revenue, MADC chuan 25.5.09 dar 11 khian MADC Forest Hall-ah a release dawn a, Literature lamah thahnem ngai taka tel theuh tura sawm kan ni. Mr.Jeffrey Khara,Ed.ML

* Minister leh MLA hnenah Silpoulin quota 50 theuh pek an ni a,tun hnuah Minister,MLA,etc recommend ziahtir tawh loh tur.DC hnenah dilna thehluh tur a ni a,verification lak hnuah atul anga mamawh dik tak te hnenah pek a ni ang,tiin Mizoram sorkar thuchhuah chuan a sawi a, hei hi zawm vek turin mipui a ngen bawk.

Saiha,May, 23 : Sawrkar laipui thar, Dr.Manmohan Singh-a kaihhruai chu lak luh a ni ta a, nimin tlai khan he sorkar thar hi Rashtrapati Bhavan-a Ashoka Hall-ah lak luh a ni. Prime Minister, Dr. Manmohan Singh hi President, Pratibha Patil-i’n rinawmna thu tiamtirin a la lut a, he inkhawmah hian Vice President Hamid Ansari, UPA hruaitu Sonia Gandhi, BJP hruaitu LK Advani, Vice President hlui, Bhairon Singh Shekhawat, PM hlui, Inder Kumar Gujral, sipai chi thum hotu lu berte,
sorkar leh sipai hotu lu ber berte, ram dang palaite leh mi pawimawh dang thahnem tak an tel a ni. Prime Minister baka Minister 19 dang lak luh takte hi sorkar hmasaa External Affairs Minister, Pu Pranab Mukherjee, Nationalist Congress hruaitu, Pu Sharad Pawar, Defence Minister, Pu AK Antony, sorkar hmasaa Home Minister, Pu P.Chidambaram, Trinamool Congress hruaitu, Pi Mamata Banerjee, Karnataka Chief Minister leh Maharashtra Governor hlui, Pu SM Krishna, Union Minister hlui leh Jammu & Kashmir CM hlui, Ghulam Nabi Azad, sorkar hmasa-a Power Minister leh Maharashtra-a Congress hruaitu hlun, Sushil Kumar
Shinde, Karnataka mi langsar leh AICC Gen.Secy, Pu M. Veerappa Moily, Andhra Pradesh-a Congress hruaitu hlun, S Jaipal Reddy, sorkar hmasaa Commerce Minister, Kamal Nath, Pu Vayalar Ravi, Dy PM hlui, Jagjivan Ram-a fanu leh hnam hnufualte hruaitu langsar, Meira Kumar, sumdawng hausa leh sorkar hmasaa Minister, Murli Deora, Supreme Court ukil hmingthang leh sorkar hmasaa Science & Technology Minister, Kapil Sibal, Congress hruaitu hlun, Ambika Soni, Assam MP leh Union Minister of state hlui, B K Handique, Congress thalai hruaitu hlui leh an party thupuangtu ni thin, Anand Sharma leh Rajasthan Congress hruaitu, Dr.C
P Joshi te an ni. Tun tumah hian sorkar laipuia hruaitu hlun ber pakhat leh sorkar hmasaa Human Resource Development Minister, Pu Arjun Singh-a leh sorkar hmasaa Railways Minister hmingtha tak, RJD hruaitu, Laloo Prasad Yadav chu an tel ta rih lo a ni. Puan tawh angin, DMK leh Congress inrem theih loh avangin PM Manmohan Singh leh Cabinet Minister 19 chauh lak luh phawt an ni a, Minister chanvo pakhatmah puan a ni rih lo bawk a ni. UPA-a tel zinga MP ngah ber zinga mi, MP 18 nei, Tamil Nadu-a DMK party chuan, an MP pasarih tal Minister-a dah an ngiat a, Congress Party khawng taka a tan tlat
si avangin, an hruaitu, Tamil Nadu CM, M. Karunanidhi chuan a Party hruaitute rawn a tul tih chhuanlamin niminchawhma khan Delhi atangin Chennai a pan a, hetianga boruak a chiangkuan loh hnu-ah hian DMK Committee sang chuan, Minister pali an neih chuan lungawi rih mai an remti ta niin News Agency-ten an sawi a, mahse Congress chuan DMK MP pahnih bak, Minister-a lak luh an duh loh thu an sawi thung a ni. DMK-in harsatna a siam avang hian, Dr Singh-a sawrkara Minister turte chu an zavaiin lak luh nghal a rem ta lova, Minister of State turte chu kar leh lam khian lak luh an nih chauh rin a ni.