Vahihsyno release dawn

Vawiin dar 11.00 Am hian MADC Forest Hall-ah Pu S.Hrachu Thawnthubu(Love story) ziah ‘Vahihsyno’ tih chu Pu MH.Tiabi,EM, Revenue, MADC chuan a tlang zarh dawn ta.Pu Pasa T.Azyu,President,MHP-in a kaihruai ang a,Pi HC. Nakua,Adviser,MHP chuan hunserh a hmang ang a,Pu S.Beima,publisher chuan report a pe ang a, Pu S.Hrachu( Thawnthubu ziaktu) chuan lawmthu a sawi ang.He programme a tel vek tura sawm kan ni.

* Karleh khi Penticost Ni hmang turin kohhran hrang hrang an inpuahchah mek zel a,programme pawh an siam uluk hle hlawm nia hriat a ni.

* Inrinni kalta khan MJA, Saiha chuan Pu M.Baithai, Editor Chhim Aw inah meeting neiin an hmalak zel dan tur an sawiho a, Press Tour a tanga zin haw Pu M.Baithai chuan zin report a pe bawk.

* Catholic hotuten Saiha an rawn tlawh a, an zingah Pu Robert Lalchhuana, Editor Romei a tel.

* Nimin piah khan ECM Moderator Rev.P.Riabi chuan Tuisih ah Biak In thar a hawng. Rev.C.Beima,EX i/c Mission chu Shillong ah kohhran hun pawimawh hmang turin a kal.ECM Hqrs chuan an Gypsy lei thar chu registration siam turin an buaipui mek.

* ECM KTP week/Day lo awm tur atan inpuahchah mek a ni a,Branch tam takin sport leh Zai a intihsiakna an nei bawk ang.

* Lunglei-ah Salvation Army etn Mother’s Day an hmang. * UPC(NE) chuan Aruna chal field Director Quarters an hawng fel ta.

*CKTP chuan 2010 Conf Hlabu buatsaih a tum. * Nimin piah khan Aizawl ah Baptist Pastor Meet neih a ni.

*ZEF convention Aizawl ah nimin khan an nei.

Editorial

BRGF hmanga rotling siam ngei a tul Pathianin Central hotute hmangin Saiha District tihmasawnna atan BRGF min pe a,tunah hian a thawhkhatna hna an thawk mek a, a contract hmutute pawh keimahni a leilung fate ngei an ni bawk a,a lawmawm tak zet a ni. Tun dinhmunah MTP Hall a hnathawktute chu entawn tlakin hna an kalpui a,hmun dang a hnathawh mek te pawh a tam,an hnathawh chu rotling tur a ni ngei em tih erawh an zawhfel hunah a lo lang chhuak dawn a,SDD VC te pawhin a hmunah ngei Video Camera nen an cover leh ngei dawn a ni. Chuvangin tuna hnathawk tute /Contractor te hian a tha thei ang berin rotling min siamsak a beiseiawm a, mipui tan a phurawm bawk a, kan beisei ang he hu-in thil a kal lo vaih erawh chuan anmahni tan tak pawh a chhe zawngin lung an phun palh ang tih a hlauh awm tho bawk a ni tih an lo hriat a tha bawk ang.

Kan hriat reng tur chu Saiha District hi District Senior 3 zinga pakhat ni siin District thar pawh tluk lo,engmah nei lo kan nih avangin tuna BRGF chiah hi kan innghahna leh kan tu leh fate bakah chhuan thar lo la awm zel tur atana rotling kan siamsak vena tur anih avangin eng ang contract pawh nise uluk thei ang bera kan siam a, Saiha district tana rotling kan siam kan siam ngei a tul tih hi a ni.


* Tunlai hian ECM Edenthar KTP chuan FT Studio-ah hla an thun mek a,Music Video pawh an siam mek zel bawk.

* Tunlai hian Mara ramah zaithiam chhuak thar an awm leh nual tawh nia hriat a ni a, zai lamah hma kan sawn chho zel a, a lawmawm tak zet a ni.

* Manchester United player hlu takte zinga mi Carlos Tevez chanchin chuan ngaihven a hlawh tak zet a, fans a lo ngah hman tawh si avangin fans te chuan Tevez chu an tan tlat a,hei hian Man.Utd hotute rilru pawh a tiphir hle a, chuvangin June thla lo awm turah Tevz chungchang bik hi chu ngaihtuah a ni ang,tiin Manchester Utd hotu D.Gill chuan a sawi phah hial a ni.

Manchester Utd fans ten Tevez an duhna em em chhan chu a chetthatna piah lamah Manchester Utd a ngainatzia leh awm zel tura a duh thu a sawi chhen vang a ni.Hetih lai hian Ronaldo chungchang erawh Real Madrid lama chhuah a tum ut ut avang khan fans ten i duh leh chhuak rawh tiin an ngaihven vak lo thung.

Tevez man hi 24-26 million vel a ni a, Kia Joorabchian chu a sum pumhmawmtu tur a ni mai a,Tevez tak hi chu Man.Utd hian an duh hle naa,a man hi to an ti deuh hlek avangin thuchiang a awm thei lova, June thla-ah pawh inbiakna nei nawn mahse Tevez cham hlenna tur lawm a kawk chuang lovang,tiin media thenkhat chuan an sawi.